Presidenti ukrainas Volodymyr Zelensky diskutoi në një takim të rregullt për çlirimin e territoreve të pushtuara nga Rusia.
“Çështjet kryesore janë fronti. Sigurimi i ushtrisë sonë, situata në zona specifike të vijës së frontit dhe ajo që ne po planifikojmë për të rritur numrin e flamujve ukrainas në qytetet në jug dhe në lindje të vendit”, tha Zelensky.
Sipas tij, betejat në rajonin e Donetskut dhe energjia u diskutuan veçmas, transmeton Telegrafi.
Javën e kaluar, u shënua një pikë historike pasi Ukraina mori në kontroll qytetin e Khersonit, kur forcat ruse tërhoqën nga bregu perëndimor i rajonit Kherson.
Po ashtu, ditë më parë, Zelensky deklaroi se ashtu sikurse në Kherson, forcat ukrainase do të priten me flamuj të Ukrainës edhe në Krime.
Ende pa hyrë trupat e para ukrainase, qytetarët në Kherson nisën festën dhe vendosën flamujt në qytet. /Telegrafi/