Për takimet e kryeministrit të Kosovës, Albin Kurti në Forumin e Ekonomik Botëror në Davos, deputeti i Lidhjes Demokratike të Kosovës (LDK), Avdullah Hoti të mërkurën ka thënë se thirrjet e tij për investitorët potencial dhe paralajmërimet për konflikt nuk shkojnë bashkë.
Në lidhje me këtë ka reaguar zëdhënësi i Qeverisë së Republikës së Kosovës, Përparim Kryeziu duke shtruar disa pyetje për Hotin.
Kryeziu përmes një statusi në rrjetin social në Facebook e ka pyetur Hotin se me çka nuk është i kënaqur.
“Me pjesëmarrjen e Kryeministrit Kurtin në Davos në mesin e shumë liderëve botërorë? Me organizimin e konferencës për investitorë të huaj? Me ftesën që po bën për investime të huaja në vend? Me takimin me kryeministren e Finlandës, vend anëtar ky i BE-së, e cila së fundmi ka aplikuar në NATO, synim ky edhe i joni? Me kërkesën për më shumë siguri për Kosovën përmes më shumë trupave të NATO-s në Kosovë? Siguria e shtuar për Kosovën është siguri edhe për investitorët. Me shpërfaqjen e Serbisë para opinionit ndërkombëtar, lidhjeve të saj me Rusinë dhe qëllimeve të përbashkëta për destabilizim të Rajonit? Me faktin që Albin Kurti është kryeministër i Kosovës? “, ka pyetur Kryeziu. /Telegrafi/
