Agjenti i Yaya Toures, Dimitri Seluk ka zbuluar se ka folur me klubet në Itali dhe Spanjë pasi kontrata e mesfushorit me Manchester City përfundon këtë verë dhe nuk ka ndonjë interes të vazhdohet.
Dimitri Seluk ka konfirmuar bisedimet se nga dje kanë filluar bisedimet me skuadrat e interesuara për shërbimet e futbollistit të tij, ku figurojnë skuadra italiane dhe spanjolle, të cilët dëshirojnë të shfrytëzojnë mundësinë e transferimit me parametra zero.
Megjithatë, agjenti i futbollistit nga Bregu i Fildishtë ka treguar se klienti i tij mundet të përfundoj edhe tek rivalët e urryer të qytetit, Manchester United, pasi për të nuk do të kishte asnjë problem.
“Nga dje ne kemi filluar zyrtarisht negociatat me klube të ndryshme në lidhje me të ardhmen e tij. Kemi pritur deri më 15 mars për atë që Manchester City do të thonë, por deri më tani nuk kanë thënë asgjë”, ka thënë fillimisht Seluk për Sky Sports News HQ.
“Para marsit, ne nuk kemi negociuar me askënd, sepse Yaya ka shumë kohë te City, kështu që ne kemi pritur. Por, ne nuk mund të presim deri në minutën e fundit, deri në qershor”.
“Disa klube më kanë kontaktuar mua. Tani ne kemi tre opsione. Nuk flas për Yayan në Kinë ose MLS. Ai do të luajë në Evropë. Unë kam folur me klube në vende të ndryshme – si Italia dhe Spanja”, transmeton Telegrafi.
“I thashë Manchester Cityt që ne do të fillojmë negociatat me klubet e tjera për të ardhmen e Yayas. Pas kësaj, në qoftë se City duan, ata mund të fillojnë negociatat. Nëse ata nuk e duan atë, atëherë ne do të gjejmë një klub tjetër”.
“Yaya mund, nesër, të nënshkruajë kontratë me një klub tjetër pasi që për Manchester Cityn është tepër vonë”.
“Manchester United? Pse jo? Jose Mourinho është një trajner shumë i mirë. Zlatan Ibrahimovic ka qenë së bashku me Yayan në Barcelonë.
“Unë e kuptoj këtë që dy klubet janë rivalë, por për mua, për shembull, kjo nuk është një problem nga Yaya ose nga unë. Ky problem do të jetë nga stafi i Manchester Cityt”, përfundoi agjenti i Toures. /Telegrafi/