Deontay Wilder ka nisur një sulm të ri kundër Tyson Furyt duke e etiketuar rivalin e tij si një frikacak, pasi ka refuzuar rimeçin e menjëhershëm. Dy boksierët nga kategoria e peshave të rënda u ndeshën në dhjetor të vitit të kaluar kur u ndanë baras dhe kishin caktuar një rimeç gjatë këtij viti.
Mirëpo, Gypsy King u tërhoq nga bisedimet duke nënshkruar një marrëveshje promovimi me Top Rank dhe ESPN. Në këtë mënyrë, britaniku u ndesh me Tom Schwarz dhe tash do të përballet me Otto Wallin.
Nga ana tjetër, amerikani duhet ta zhvillojë rimeçin me Luis Ortiz kah fundi i këtij viti, derisa dueli i sërishëm ndërmjet Wilderit dhe Furyt pritet të ndodhë kah muaji shkurt i vitit të ardhshëm.
“Nuk i kuptoj këta karaktere. Nuk e di se çfarë mendojnë ata. Gjithçka është argëtim dhe lojë për Tyson Furyn. Po të mos ishte ashtu, ai do të ndeshej me mua menjëherë”.
“Po ta kishte zemrën e një luftëtari dhe qëndrimin e një luftëtari dhe një kampioni, ai do ta zhvillonte rimeçin me mua menjëherë. Dhe jo të priste derisa ta shpëtonte dikush, në mënyrë që të kishte një arsye për t’u tërhequr nga përballja”.
“Ai e di se nuk do të përfitojë 100 milionë dollarë, as madje 80 milionë dhe ndoshta nuk janë as 70 milionë (nga ajo kontratë)”.
“(Fury) dëshiron të sillet sikur ka marrë kontratë 100 milionë dollarëshe; që nuk është e vërtetë, por dëshiron ta shfrytëzojë si një arsye për të mos u ndeshur me mua, kjo tregon se është frikacak, frikacaku më i ndyrë që kam parë”, ka deklaruar Wilder për Boxing Scene. /Telegrafi/
