Viti i kaluar ka qenë më i kushtueshmi për buxhetin e vendit, kur bëhet fjalë për shpenzimet në telefoni mobile, pavarësisht që gjysma e tij kaloi në bllokadë, raporton KTV.
E shuma të mëdha të parasë publike kanë shkuar edhe për mëditje, karburante e dreka, por përgjegjësi nuk është dhënë. Vetëm në telefoni mobile vitin e kaluar janë shpenzuar 145 mijë euro, thuhet në publikimin e fundit të institutit GAP.
Sipas Agron Demit nga Instituti GAP, zyrtarët të shumtë tejkalojnë udhëzimet administrative që rregullojnë normat e shpenzimit të parasë publike, dhe se askush nuk ka dhënë përgjegjësi për këtë.
Gjithashtu, një prej vështirësive për të përcjellë rrjedhën e parasë publike është edhe mos-transparenca, derisa Demi përmend dy prej organizatave buxhetore, Ministrinë e Jashtme dhe zyrën e kryeministrit, që tash e disa vjet nuk iu janë përgjigjur kërkesave për qasje në dokumente zyrtare.
Por, qeveria e re, të paktën në një prej këtyre kategorive, thotë të ketë reduktuar shpenzimet, përcjell koha.net. Sipas zëdhënësit Arban Abrashi, në gjashtë muajt e parë të vitit 2015 shpenzimet për karburant janë zvogëluar për rreth 1 milion euro, krahasuar me gjashtëmuajshin e vitit të kaluar.
Veturat zyrtare shpeshherë janë hasur në vende bregdetare në fundjava e gjatë kohës së pushimeve, që ka ngjallur edhe reagimin e qytetarëve, por që sipas Abrashit, ndodh që të jenë edhe në udhëtime zyrtare.
Kryeministri Mustafa, në mbledhjen e 4 majit kishte theksuar se do të kërkonte nga MPB-ja ndalimin e makinave zyrtare ditët e fundjavës dhe festave, por ndonjë rast i tillë nuk është evidentuar.
