Presidentja e Kosovës, Vjosa Osmani, ka thënë të martën se nuk ka bazë ligjore për t’u kontestuar vendimi i saj për mosdekretimin e Blerim Isufajt si pozitën e Kryeprokurorit të Shtetit.
Në një konferencë për media duke folur për mundësinë që vendimi të përfundojë në Gjykatën Kushtetuese, Osmani ka thënë se një gjë e tillë mund të ndodh vetëm për arsye politike e jo ligjore.
Ndaj, ajo është shprehur se “kushdo që dëshiron betejë politike me mua, betejë politike do të ketë”.
“I inkurajoj deputetët që ta lexojnë këtë dokument ku janë të evidentuara të gjitha shkeljet në këtë procedurë të përzgjedhjes së kryeprokurorit. Kushdo që e lexon këtë dokument dhe e sheh se sa masive janë shkeljet në këtë procedurë, nuk do ta merrte përsipër që ta dërgonte një vendim të tillë në Gjykatën Kushtetuese sepse nuk ka bazë ligjore për të kontestuar diçka që në fakt merret pikërisht për të kthyer ligjshmërinë dhe kushtetutshmërinë në proces.
A në qoftë se për arsye politike zgjedhin një rrugë të tillë, atëherë për mua nuk është betejë ligjore, por betejë politike. Kushdo që dëshiron betejë politike me mua, betejë politike do të ketë”, ka deklaruar presidentja.
Ajo tutje ka ripërsëritur se Këshilli Prokurorial i Kosovës disa herë ka bërë presion për përzgjedhjen e kryeprokurorit.
“Ju e dini se Këshilli Prokurorial në bazë të ligjit dhe kushtetutës ka të drejt që të bëjë propozimin e kandidatit për kryeprokuror vetëm një herë dhe pastaj ky propozim të vlerësohet nga ana e Presidencës. Unë vazhdimisht i kam njoftuar se për shkak që kjo lëndë kontestohej në gjykata, unë e kam lënë vlerësimin e procedurës që ta bëj pasi të përfundojë kjo çështje në gjykatat tona. Fatkeqësisht nga aspekti përmbajtjesor kjo temë nuk u trajtua në gjykata, por unë e kam kryer detyrën time duke bërë vlerësimin e procedurës”.
Presidentja ka përmendur edhe mesazhe, në të cilat, siç ka thënë, ka pasur edhe kërcënime për ngritje aktakuzash e arrestime.
“Çdo letër tjetër që KPK-ja dërgonte përkundër faktit që e dinte se pse nuk po merret vendimi, ka qenë presion i paligjshëm dhe jokushtetues. Ka pasur edhe presione të tjera të paligjshme. Njerëz dërgonin mesazhe që nëse nuk e dekreton dhe nënshkruan do të ngrisin aktakuza, do t’i lidhim duart. Por, ata duhet ta dinë se në këto dy dekada që jam në politikë, presionet asnjëherë nuk kanë bërë punë e as nuk do të bëjnë asnjëherë”, ka thënë Osmani. /Telegrafi/