Varianti i ri COVID-19, Omicron ishte i pranishëm në shtetin holandez një javë përpara se disa pasagjerë të ardhur nga Afrika e Jugut të bartnin virusin, thanë të martën zyrtarët shëndetësorë holandezë, duke vënë në pikëpyetje afatin kohor të përhapjes së variantit në Evropë.
Varianti Omicron u konfirmua në dy mostra testimi të marra më 19 nëntor dhe 23 nëntor, tha të martën Instituti Kombëtar për Shëndetin Publik dhe Mjedisin (RIVM), raporton cnn.
Autoritetet holandeze më parë besonin se rastet e para të variantit Omicron kishin mbërritur më 26 nëntor pasi 14 pasagjerë të fluturimit nga Johannesburg dhe Capetown rezultuan pozitivë, transmeton Telegrafi.
Omicron, i njohur gjithashtu si B.1.1.529, ka një numër jashtëzakonisht të lartë të mutacioneve, duke shkaktuar frikën se mund të shmangë vaksinat dhe të zgjasë pandeminë.
Dy rastet e reja të zbuluara në Holandë e çojnë numrin e përgjithshëm të rasteve të konfirmuara në vend në 16, tha RIVM. Të paktën 20 vende dhe territore kanë konfirmuar raste të variantit Omicron deri më tani, ku më i fundit është Brazili.
Të paktën 70 vende, mes tyre Shtetet e Bashkuara, vendosën kufizime të reja udhëtimi nga disa vende afrikane pasi Omicron u identifikua për herë të parë nga shkencëtarët afrikano-jugor. /Telegrafi/