Ushtria ukrainase merr sërish nën kontroll një qytet në afërsi të Kievit

Në një video mesazh të mbrëmshëm të presidentit ukrainas, Volodymyr Zelensky, ka thënë se forcat e armatosura të Ukrainës refuzojnë ultimatumet e ushtrisë ruse – duke theksuar se kanë ndaluar avancimin e tyre në terren.

Madje është bërë të ditur se një aeroplan rus është rrëzuar në rajonin Kharkiv, ku gjendet qyteti i dytë më i madh në Ukrainë, transmeton Telegrafi.

Përveç kësaj, ushtria ukrainase pretendon se forcat e saj sërish kanë marrë nën kontroll qytetin Makariv, në afërsi të Kievit.

Shtabi i forcave të armatosura në Ukrainë, thotë se trupat e saj kanë detyruar rusët të tërhiqen rreth 60 kilometra nga Kievi.

“Falë veprimeve heroike të mbrojtësve tonë, flamuri shtetëror i Ukrainës ka valëvitur mbi qytetin Makariv”, thuhet në kumtesën e postuar në Facebook. /Telegrafi/