Pjesëtarët e Brigadës Lyut të ushtrisë ukrainase ia mësynë istikameve në të cilat ishin pozicionuar rusët, duke arritur t’i marrin nën kontroll dhe të detyrojnë një ushtar të Vladimir Putinit të dorëzohet në afërsi të Bakhmutit.
Ushtarët ukrainas nga regjimenti Tsunami po patrullonin në fushëbetejë kur zbuluan istikamet e rusëve, transmeton Telegrafi.
Pamjet e kamerave të vendosura në helmetat e ushtarëve, shfaqin ukrainasit duke u futur nëpër istikame dhe të sulmojnë pozicionet e rusëve.
Brigada Lyut është forcë speciale policore e ushtrisë, që përbëhet nga regjimenti Safari, Tsunami dhe batalioni Luhansk-1.
Batalionet Myrotvorets, Skif dhe Zakhid i ishin bashkuar Lyut-it në fillim të vitit 2023. Motoja e tyre është “zemërimin shndërroje në armë”.
Ata edhe gjatë verës ia kishin mësyrë pozicioneve të rusëve në rajone të ndryshme, duke u përpjekur të rikthejnë kontrollin e disa qyteteve dhe fshatrave që ishin nën kontrollin e rusëve.
E në aksionin e fundit, një ushtar rus detyrohet të dorëzohet, pasi e kupton se nuk ka nga t’ia mbajë dhe vazhdimisht gjuhej me pushkë automatike dhe me granata dore. /Telegrafi/
