Ukraina ka mohuar çdo përfshirje në sulmin e shtatorit në tubacionet Nord Stream, të cilat u ndërtuan për të transportuar gaz natyror rus në Gjermani.
Mohimi vjen pas një raporti nga New York Times, i cili citon zyrtarë anonimë të inteligjencës amerikane që sugjerojnë se një grup pro-ukrainas ishte fajtor, shkruan BBC, përcjell Telegrafi.
Mykhailo Podolyak, një këshilltar i presidentit ukrainas, tha se Ukraina “absolutisht nuk ishte e përfshirë”.
Rusia ka fajësuar Perëndimin për shpërthimet dhe i bëri thirrje Këshillit të Sigurimit të OKB-së që t’i hetojë në mënyrë të pavarur ato.
Dërgesat e gazit rus ishin pezulluar përpara shpërthimeve. Rusia mbylli gazsjellësin Nord Stream 1 në gusht të vitit të kaluar, duke thënë se kishte nevojë për mirëmbajtje. Nord Stream 2 nuk ishte vënë kurrë në shërbim.
Shkaku i saktë i shpërthimeve të 26 shtatorit që goditën tubacionet e gazit natyror nuk dihet, por besohet gjerësisht se ato janë sulmuar.
Udhëheqësit e NATO-s dhe perëndimorë nuk kanë akuzuar drejtpërdrejt Rusinë për sulmin e tubacioneve të veta, megjithëse BE-ja ka thënë më parë se Rusia përdor tubacionet e saj të gazit si një armë kundër Perëndimit.
Ndryshe, të martën, New York Times raportoi se informatat e re të rishikuara nga zyrtarët amerikanë sugjeroi se një grup pro-ukrainas kishte kryer sulmin në tubacionet Nord Stream.
Duke cituar zyrtarë anonimë amerikanë, raporti tha se nuk kishte prova që Presidenti ukrainas Volodymyr Zelensky ose togerët e tij të lartë të ishin përfshirë në operacion. /Telegrafi/