Ushtria e Ukrainës ka një shans për të larguar trupat ruse nga i gjithë territori që ata kanë pretenduar se kanë marrë që nga shkurti, ka thënë një analist i lartë ushtarak për Sky News.
Profesori Michael Clarke tha se një zhvillim i tillë do të ishte një “fitore e madhe” – duke shtuar se ndërsa fitimet e fundit në Kharkiv janë të rëndësishme, rimarrja e Khersonit në jug do të ishte “shumë domethënëse”.
Kherson ndodhet në veri të gadishullit të Krimesë dhe është i vetmi qytet i madh ukrainas që Moska ka pushtuar.
Nëse Ukraina do ta merrte atë, e gjithë Krimea – të cilën Rusia e aneksoi në 2014 – do të ishte brenda rrezes së artilerisë dhe raketave të Kievit, vlerëson Clarke, përcjell Telegrafi.
Kjo mund ta bëjë Krimenë “të pamundur që rusët të veprojnë ushtarakisht”, shtoi ai.
Ndryshe, ka shenja se mbrojtja ruse në Kherson ka filluar të “shkërmoqet” dhe trupat mund të jenë pa municione.
“Ukrainasit kanë marrë vrull në anën e tyre dhe në betejë, momenti ka një rëndësi të madhe”.
“… Rusëve duket se u mungon ushqimi dhe gjithçka. Pasi u mbarojnë municionet, ata nuk kanë zgjidhje tjetër veçse të dorëzohen ose të vrapojnë”.
“Dhe ata nuk mund të vazhdojnë sepse nuk mund të kalojnë lumin Dnipro”.
Ai shtoi: “Rusët janë qartësisht nën presion… Por trupat që rusët kanë në Kherson janë trupa me cilësi më të mirë në përgjithësi. Pra, nëse ata ‘shpartallohen’, në atë zonë, kjo do të ishte shumë domethënëse”.
Sipas shkrimit të Sky News, përcjell Telegrafi, profesor Clarke shpjegoi se Kherson “kontrollon hyrjen në Krime” dhe “kontrollon një pjesë të energjisë hidrike që shkon në Krime”.
Ai vazhdoi: “Nëse ukrainasit janë në gjendje të rrëmbejnë të gjithë bregun e rajonit Kherson, atëherë e gjithë Krimea është brenda rrezes së artilerisë dhe raketave të tyre”.
Në pjesën e fundit të shkrimit thuhet se Clarke parashikon vitin e ardhshëm një “armëpushim të paqëndrueshëm, i cili tani mund të jetë në kushte më të favorshme nga sa mund të kishin menduar ukrainasit edhe një javë më parë”.
Ai komentoi: “Unë mendoj se ukrainasit mund të kenë një shans, në anën tjetër të dimrit, për të ‘hedhur’ rusët nga të gjitha territoret që kanë marrë që nga shkurti i këtij viti”.
“Dhe kjo do të ishte një fitore e madhe”. /Telegrafi/