Kosova e ka zhvilluar stërvitjen e parë pasditen e të hënës në Kampin Nacional të FFK-së në Hajvali duke i nisur kështu përgatitjet për ndeshjet kualifikuese të këtij muaji, ndaj Izraelit dhe Andorrës.
Në deklaratën e tij, portieri Samir Ujkani është shprehur se skuadra duhet të besojë në kualifikim dhe duhet të japë maksimumin në të gjitha përballjet për arritjen e këtij objektivi.
“Kemi filluar të përgatitemi për dy ndeshjet e para. Është shumë e rëndësishme të fillojmë mirë, sepse qëllimi ynë është të besojmë te kualifikimi edhe pse e dimë se është shumë e vështirë, pasi grupi është shumë i rrezikshëm”.
“Kemi shumë respekt për kundërshtarët, por çdo lojë për neve është finale dhe sigurisht se në ndeshjet në shtëpi me tifozët tanë do të jemi edhe më të fortë. Besoj se mund të arrijmë qëllimin tonë për t’u kualifikuar”.
“Sikur Izraeli edhe Rumania, por edhe të gjitha ekipet tjera janë kandidatë për t’u kualifikuar dhe për këtë arsye them se është grup shumë i rrezikshëm. Në çdo ndeshje duhet të japim maksimumin dhe grupi duhet të jetë në 100 përqindëshin e tij në mënyrë që të kemi gjasa për kualifikim”.
“Me forcat tona, bashkë me tifozët tanë të cilët do të na shtyjnë përpara mendoj se ka ardhur koha që duhet të besojmë në kualifikim”, është shprehur Ujkani.
