Presidenti amerikan, Donald Trump u tha gazetarëve në Shtëpinë e Bardhë se beson që Shtetet e Bashkuara “do ta kenë Gazën”, duke përmendur “autoritetin amerikan”.
“Do ta kemi, do ta mbajmë dhe do të sigurohemi që të ketë paqe, që të mos ketë asnjë problem, askush nuk do ta vërë në dyshim dhe ne do ta menaxhojmë atë në mënyrën më të duhur”, tha sot lideri amerikan gjatë një takimi me Mbretin Abdullah II të Jordanisë.
Presidenti tha se do të dëshironte që Gaza të zhvillohej në një zonë fitimprurëse me resorte dhe ndërtesa zyrash, shkruan cnn.
I pyetur nga gazetarët në Zyrën Ovale se çfarë do t’i lejonte Shteteve të Bashkuara të merrnin kontrollin e territorit sovran të Gazës, Trump u përgjigj se “nën autoritetin amerikan.”
Gjithashtu, të martën, Trump hodhi poshtë idenë se SHBA-ja mund ta blinte këtë tokë.
“Nuk do të na duhet të blejmë … do ta kemi Gazën, nuk kemi nevojë të blejmë, nuk ka asgjë për të blerë”, tha ai.
“Është një zonë e shkatërruar nga lufta. Do ta marrim, do ta mbajmë, do ta vlerësojmë, do ta zhvillojmë, dhe në fund shumë vende pune do të krijohen për njerëzit në Lindjen e Mesme. Do të jetë për njerëzit në Lindjen e Mesme, por mendoj se mund të bëhet një diamant”, shtoi 78-vjeçari.
Ndryshe, mbreti jordanez beson me gjithë zemër se “pavarësisht të gjitha sfidave që kemi në Lindjen e Mesme, se më në fund shoh dikë që mund të na çojë drejt fundit për të sjellë stabilitet, paqe dhe mirëqenie për të gjithë ne në rajon”. /Telegrafi/