Besa e befasoi Feronikelin në kuadër të javës së 26-të në Superligën e Kosovës, duke e mposhtur 2-1.
Trajneri i Niklit, Klodian Duro ka uruar pas ndeshjes skuadrën nga Peja, duke thënë se ata nuk ia dolën shkaku i orari të ngjeshur që kishin, por edhe nga disa vendime të kontestueshme.
“Nuk futemi në luftën për mbijetesë. E dimë gjithë se çfarë ekipi ka Feronikeli. E kemi parë në kampionat”, ka thënë strategu i skuadrës nga Drenasi.
“Vinim nga dy përballje të forta ndaj Prishtinës në ligë dhe në Kupë. Ndikoi orari i ngjeshur. Duhet të merrnim maksimumin, provuam gjithçka por, përballë gjithçkaje, nuk ia arritëm”.
“E uroj Besën. Organeve ia lë ta gjykojnë çdo gjë që organizon në Kampionatin e Kosovës. Kanë komisione që verifikojnë çdo gjë. Nuk dua të merrem me penallti”.
“Kam shumë punë me ekipin, kemi treguar futboll evropian. Do ta vazhdojmë rrugën tonë. Objektivi është që të vazhdojmë të jemi një klub që kërkon të fitojë trofe”, ka thënë pas ndeshjes Duro”.
Feronikeli ka 31 pikë në pozitën gjashtë në tabelë, vetëm katër më shumë se Drenica që është e nënta, pozitë kjo që çon në Ligën e Parë. /Telegrafi/