Tifozët e Real Madridit nuk kursyen lojtarët e tyre në dalje të Santiago Bernabeut pas humbjes 1-4 nga Ajaxi, ku më këtë rast u eliminuan nga Liga e Kampionëve.
Në përfundimit disa tifozë u mblodhën te porta dhe pritën daljen e lojtarëve me makinat e tyre dhe normalisht që ata u treguan të ashpër drejt lojtarëve, ku nuk munguan dhe fyerjet.
Normalisht që nuk kursyen portierin Thibaut Courtois, i cili erdhi gjatë verës nga Chelsea.
Një nga thirrjet e tifozëve drejt belgut e kapur nga kamera e AS ishte: “Ti nuk mund të ndalosh as një taksi. Kthehu te Atletico”.
Vlen të theksohet se shumica e tifozëve të Los Blancos ishin që në fillim kundër transferimit të tij, pasi ata preferonin blerjen e një lojtari në fazën sulmuese, e jo të një portieri.
Përveç ndaj lojtarëve, nuk munguan edhe koret kundër presidentit Florentino Perez.
Në rrjetet sociale disa prej tyre dëshirojnë rikthimin të Keylor Navas, me të cilin kanë fituar tri Liga të Kampionëve. /Telegrafi/
