Theo Walcott ka emëruar tre lojtarë që do t’i mirëpriste tek Arsenali këtë verë, pasi ish-klubi i tij po përpiqet dëshpërimisht të arrijë në nivelin e nevojshëm për të fituar Ligën Premier .
Me përjashtim të një mrekullie, ‘Topçinjtë’ do të humbasin sërish trofeun e Ligës Premier këtë sezon, me Liverpoolin që ka 13 pikë epërsi në krye të tabelës.
Përfundimi si nënkampion do të ishte hera e tretë radhazi për Arsenalin në vendin e dytë dhe do të testonte vërtet vendosmërinë si të klubit ashtu edhe të Mikel Artetës, të cilët kanë synuar ta udhëheqin Arsenalin drejt titullit të parë që nga viti 2004.
Në përgjithësi të gjithë bien dakord që Arsenali duhet të nënshkruajë me një sulmues të ri këtë verë pasi këtë nuk ia dolën ta bëjnë gjatë afatit kalimtar të janarit.
Nënshkrimi i ëndrrave për Walcott do të ishte sulmuesi i Newcastle United, Alexander Isak, i cili po lidhet edhe me disa klube të tjera si Real Madrid, Chelsea, Manchester United dhe Liverpool.
Ish-anësori i Anglisë, Walcott, ka kërkuar gjithashtu nga klubi për të nënshkruar me Bryan Mbeumo nga Brentford dhe Callum Hudson-Odoi nga Nottingham Forest.
Chelsea e shiti Hudson-Odoin për vetëm 5 milionë funte në vitin 2023, por 24-vjeçari i cili dikur ishte subjekt i një oferte prej 50 milionë funtesh nga Bayern Munich, po lulëzon në ‘City Ground’, duke ndihmuar Nottingham Forest të luftojë për një vend që dërgon në Ligën e Kampionëve.
“Unë nuk mendoj se Arsenalit i duhen tre lojtarë të rinj, do të thosha se ata kanë nevojë vetëm për një”.
“Isak është ai që të gjithë duan. Por nëse do të më mbani një armë në kokë dhe do të më kërkoni të them edhe dy të tjerë, me siguri do të thosha dikë si Mbeumo si zëvendësim i Sakas”.
“Ndoshta do të testoja ujërat me një tjetër sulmues në krahun e majtë, sepse gjithçka ka të bëjë me shënimin e golave për Arsenalin, pasi ata nuk po pësojnë shumë të tillë”.
“E di që nuk do ta prisnit, por do të doja dikë si Hudson-Odoi, ai luan nga e majta. Ju ndoshta nuk e prisnit që unë të thoja këtë, por më zutë në befasi”, ka thënë Walcott./Telegrafi/