Me tensione dhe rivalitet bëhet edhe matja zyrtare – dallim i madh në peshë mes Wilder dhe Furyt

Vetëm një ditë para duelit më të madh të vitit në boksin botëror, janë bërë edhe matjet zyrtare të dy protagonistëve, Deontay Wilder dhe Tyson Fury.

Pas konferencës për shtyp që kaloi me shumë tensione, njëjtë kaloi edhe matja zyrtare.

Dy boksierët u përplasën verbalisht, por mbajtën distancë të madhe me njëri-tjetrin falë edhe pjesëtarëve të sigurimit të cilët ishin të pranishëm.

Lexo po ashtu Fitimet që pritet të arkëtojnë Wilder dhe Fury nga meçi për titullin e WBC-së

Wilder u shfaq me maskën e tij të zakonshme për të cilën edhe njihet me pseudonimin “Bombarduesi i Bronztë“, ndërkaq Tyson Fury u shfaq tejet energjik duke treguar trupin e tij më në formë se kurrë.

Pas matjeve që ata i bënë, u kuptua dallimi i madh në peshë mes dy boksierëve, edhe pse Fury humbi shumë peshë për dallim nga e njëjta kohë vitin e kaluar.

Lexo po ashtu E fshehta prapa humbjes së jashtëzakonshme në peshë të Tyson Furyt: Programi i posaçëm i dietës dhe stërvitjeve

Boksieri britanik peshon 116 kilogramë, një ditë para duelit të rëndësishëm, kurse kundërshtari i tij amerikan peshon plot 20 kilogramë më pak, pra 96 kilogramë.

Përkundër dallimit të madh në peshë, Fury ka zhvilluar përgatitje intensive dhe përkundër këtij dallimi që mund t’i mundësojë lëvizje më të shpejtë amerikanit Wilder, britaniku do të provojë ta befasojë në secilin rast.

Dueli zhvillohet mëngjesin e të dielës sipas kohës tonë, fillimi i meçit pritet të jetë rreth orës 06:00.

Arena ku do të mbahet ky duel është Staples Center, Los Angeles, Shtetet e Bashkuara të Amerikës. /Telegrafi/