Të paktën dy të vdekur, i dyshuari është një student – detaje dhe pamje të tjera nga të shtënat me armë në Roterdam

Dy persona u vranë si pasojë e incidenteve të të shtënave në Roterdam të enjten. Një vajzë 14-vjeçare është plagosur rëndë.

Ky është informacioni i fundit që vjen nga Roterdami i Holandës, nga ku me herët u raportua për të shtëna armësh në dy vende.

Siç thuhet më tej, i dyshuari, një 32-vjeçar nga Roterdami, është student në Universitetin Erasmus dhe i njohur për organet e drejtësisë, përcjell Telegrafi.

Dhe pas dy incidenteve të të shtënave në dy vende, një 32-vjeçar banues në Roterdam u arrestua nën helipadën e Erasmus MC.

Ai dyshohet për të shtëna dhe zjarrvënie në një shtëpi në Heiman Dullaertplein në lagjen Delfshaven.

Lexo po ashtu Një burrë i armatosur dhe me veshje ushtarake hapi zjarr brenda një spitali në Roterdam – pamjet tregojnë kaosin e krijuar

“Ai qëlloi në drejtim të dy personave atje”, tha policia, duke shtuar se bëhet fjalë për një grua 39-vjeçare dhe një vajzë 14-vjeçare.

Më pas ai dyshohet se qëlloi një burrë 46-vjeçar në një klasë në Erasmus MC.

Ky i fundit vdiq, sikurse edhe gruaja në shtëpi.

Përveç të shtënave, bëhet e ditur se ndezi një zjarr në spital.

Ndërkohë policia ka thënë se nuk dyshon për ndonjë sulmues të dytë. /Telegrafi/