Trajneri i Barcelonës, Xavi Hernandez ka konfirmuar fjalët e presidentit të klubit, Joan Laporta, se ekipi do të përforcohet së paku me dy futbollistë tjerë.
Barcelona ka hasur në vështirësi për transferime dhe regjistrimin e lojtarëve këtë verë, shkaku i problemeve financiare.
Megjithatë, ato janë rregulluar tashmë dhe presidenti i klubit, Laporta, deklaroi sot (e diel) para ndeshjes me Villarrealin, se ekipi do të përforcohet.
Fjalët e Laportas janë konfirmuar tashmë nga trajneri Xavi, i cili tregoi edhe pozitat ku synojnë të përforcohen.
“Do të ketë më shumë se një nënshkrim? Po, ajo që tha Presidenti është e vërtetë. Ne do të përpiqemi të nënshkruajmë me të paktën 2 lojtarë”.
“Ne do të përpiqemi të nënshkruajmë me një mbrojtës të krahut dhe një sulmues”, ka thënë trajneri i Barcelonës.
Barcelona pritet të nënshkruajë me Joao Cancelo në ditët në vijim. Sa i përket pozicionit sulmues, Joao Felix mund të jetë i zgjedhuri duke iu bashkuar ekipit në formë huazimi deri në fund të sezonit.
Afati kalimtar i transferimeve verore mbyllet më 1 shtator. /Telegrafi/