Instituti Hidrometorologjik i Kosovës (IHMK) ka njoftuar se duke filluar nga pasditja e sotme dhe nesër pritet të ketë reshje shiu dhe vërshime në disa pjesë të vendit.
Sipas tyre, fillimisht do të ketë reshje shiu në pjesën perëndimore dhe jugore, të cilat gradualisht do ta përfshinë pjesën më të madhe të vendit, ndërsa intensiteti dhe sasia më e madhe e tyre pritet të jetë në pjesën jugore dhe jugperëndimore të Kosovës.
Tutje në njoftim thuhet se si pasojë e këtyre reshjeve mund të ketë vërshime të shpejta në disa pjesë të Kosovës.
Këto vërshime siç thonë nga instituti mund të shkaktojnë vështirësi dhe probleme, si në rrëshqitje të dheut, mbyllje të kanalizimeve dhe vështirësi të qarkullimit.
“Si pasojë e këtyre reshjeve nëpër disa pjesë të Kosovës, sidomos në Pellgun e Lumit Lepenc (Brezovicë, Shtërpcë, Kaçanik, Hani Elezit, Ferizaj), pastaj pjesa jugore e Dukagjinit (rrethi i Prizrenit, Therandës, Dragashit etj.), mund të krijohen vërshime të shpejta, të cilët mund të shkaktojnë vështirësi dhe probleme, si në rrëshqitje të dheut, mbyllje të kanalizimeve dhe vështirësi të qarkullimit”, thuhet në njoftimin e IHMK-së. /Telegrafi/
