Manchester Unitedi e ka siguruar kualifikimin në raundin e pestë të Kupës FA, pas fitores prej 3-1 kundër Arsenalit në stadiumin Emirates.
Kjo ishte fitorja e tetë radhazi e Djajve të Kuq nën drejtimin e Ole Gunnar Solskjaer, ndërsa pas ndeshjes trajneri i ka treguar taktikat e tij për këtë lojë.
Norvegjezi u kishte treguar lojtarëve të tij shembuj klasikë të golave nga kundërsulmet, në mënyrë që t’i frymëzonte për fitore ndaj Topçinjve.
Alexis Sanchez, Jesse Lingard dhe Anthony Martial, i shënuan golat e tyre pikërisht nga kundërsulmet dhe për këtë është meritor Solskjaer.
“Kemi luajtur si një ekip i duhur. Një ekip i kompletuar. Kemi punuar shumë në mbrojtje dhe kundërsulme”.
“Kundërsulmi është diçka klasike për Manchester Unitedin. Ka shumë shembuj për këtë kundër Arsenalit – Wayne Rooney, Cristiano Ronaldo, Ji Sung Park dhe ne ua treguam atyre (lojtarëve) këto video”.
“Kemi bërë një hap të madh përpara. Ishte një përmirësim i madh nga loja kundër Tottenhamit. Është lehtë të entuziazmohesh dhe të flasësh për të ardhmen, por ne duhet të vazhdojmë punën dhe të mendojmë për ndeshjen e radhës”, ka deklaruar Solskjaer për BBC Sport. /Telegrafi/
