Interi është drejt dështimit të sezonit, pasi gjendet larg vendit të tretë që e kishte si objektivë në fillim të kampionatit.
Trajneri Roberto Mancini po bën llogaritë për sezonin e ardhshëm dhe duket se nga Interi do të ketë shumë largime pasi lojtarë si Samir Handanovic, Mauro Icardi dhe të tjetër kërkojnë me çdo kusht aktivizimin në Ligën e Kampionëve.
Sulmuesi malazez, Stevan Jovetic ka ardhur me bujë të madhe nga Anglia dhe Interi e ka huazuar për dy vite, duke paguar 2.5 milionë euro, por shumë shpejt Jovetic do të rikthehet në Angli apo në një tjetër kampionat, pasi Interi nuk bindet për të paguar kartonin e tij.
I sigurt duket edhe largimi i mbrojtësit Miranda, i cili po kërkohet nga Bayern Munich dhe Manchester United që janë gati të paguajnë 11 milionët e kërkuara për kartonin e tij.
Zikaltrit mund të humbasin edhe sulmuesin Adem Ljajic, Eder dhe mbrojtësin Teles. Serbi kërkon të rikthehet në Romë pasi nuk është i lumtur nga marrëdhënia me Mancinin, ndërsa Eder nuk ka bindur dhe ka rezultuar një blerje e dështuar.
Për sa i përket mbrojtësit Teles, blerja përfundimtare e këtij të fundit i kushton financave të Interit. /Telegrafi/