Trajneri i Atletico Madridit, Diego Simeone ka folur për herë të parë pas një oferte të marrë para disa javësh nga klubi i Superligës së Arabisë Saudite, Al Ahli.
Superliga e Arabisë Saudite është më aktivja në afatin kalimtar të verës duke marrë emra të mëdhenj lojtarësh nga të gjitha ligat kryesore.
Karim Benzema, N’Golo Kante, Roberto Firmino, Kalidou Koulibaly dhe Riyad Mahrez janë vetëm disa nga emrat e transferuar në këtë verë.
Megjithatë, klubet saudite po mendojnë edhe për trajnerë të mëdhenj për të përforcuar edhe më shumë kampionatin.
Skuadra e Al Ahli u raportua se bëri një ofertë të madhe mbi 100 milionë në sezon për Diego Simeone të Atletico Madridit, por kjo u refuzua nga argjentinasi.
Tani pas disa javësh është vet Simeone, i cili ka folur për ofertën dhe nëse ka hezituar ta pranoj.
“A më bëri oferta saudite të hezitoj? Jo, e vërteta është se jam shumë i lumtur këtu ku jam. Jam shumë i lumtur që jam te Atletico”, ka thënë fillimisht Simeone për Marca.
“Nuk hezitova me ofertën nga Arabia Saudite, as nëse e shtojnë atë. Jam i lumtur në Atletico”, përfundoi trajneri argjentinas. /Telegrafi/