Derisa ukrainasit gjenden në ditën e 114-të të agresionit rus mbi vendin e tyre, mediat raportojnë se luftimet intensive vazhdojnë në jug dhe lindje të Ukrainës.
Kjo sipas tyre po ndodh për shkak se forcat ruse kërkojnë të konsolidojnë kontrollin e rajoneve të Luhansk dhe Donetsk.
Kështu, siç shkruan Sky News, përcjell Telegrafi, trupat e Kremlinit po nisin sulme tokësore në Severodonetsk dhe vendbanime përgjatë linjave tokësore të komunikimit të Ukrainës me Lysychansk, thotë Instituti për Studimin e Luftës (ISW).
E qyteti i Severodonetsk mbetet një fushë beteje kryesore në rajonin e Luhansk.
Veç këtyre, luftëtarët ukrainas së bashku me civilët janë ngujuar në fabrikën kimike Azot në qytet, një diçka e ngjashme me mbrojtjen e famshme të fabrikës së çelikut Azovstal në Mariupol më herët gjatë luftës.
Ndërkohë presidenti Volodymyr Zelensky ka përshëndetur një “hap të madh përpara” në përpjekjen e Ukrainës për t’u bashkuar me BE-në.
Ai tha se vendi i tij ka mbështetje “të fuqishme” nga Franca, Gjermania, Italia dhe Rumania për aplikimin e tij.
Komentet e presidentit Zelensky erdhën pasi ai u takua me presidentin francez Emmanuel Macron, kancelarin gjerman Olaf Scholz, kryeministrin italian Mario Draghi dhe presidentin rumun Klaus Iohannis.
“Ishte e rëndësishme për mua të dëgjoja një tjetër gjë thelbësore nga liderët – ata pajtohen që fundi i luftës në Ukrainë dhe paqja duhet të përcaktohen saktësisht siç i sheh Ukraina”.
Veç këtyre, gjatë ditës së premte, Komisioni Evropian ka mbështetur Ukrainën dhe Moldavinë që të bëhen kandidatë për anëtarësim në BE.
Por liderët e vendeve të BE-së do të thonë fjalën e fundit në një samit në Bruksel më 23-24 qershor.
Në anën tjetër, presidenti rus, Vladimir Putin ka mbajtur një fjalim në të cilin ka fajësuar Perëndimin për krizat në botë. /Telegrafi/