Rreth tri javë më parë, Jennifer Lopez dhe Shakira emocionuan të gjithë me performancën e tyre në finalen e “Super Bowl”.
Shfaqja, e cila u mbajt në Miami, u hap me një performancë të mahnitshme nga këngëtarja Demi Lovato, e cila njëherësh shënoi performancën e saj të dytë ‘live’ pas rikthimit nga rehabilitimi.
Megjithëse dy yjet e muzikës pop, Shakira dhe J.Lo ishin në qendër të vëmendjes dhe befasuan me interpretimin e tyre, nuk ishin të gjithë të këtij mendimi.
Siç raportohet nga tabloidet e huaja, 1312 amerikanë u ankuan te FCC, agjenci e pavarur në Shtetet e Bashkuara të Amerikës që kontrollon komunikimet në radio e televizion kudo në ShBA.
Ankesat më të mëdha erdhën nga prindërit, të cilët deklaruan se fëmijët e tyre u ekspozuan në një ‘shfaqje porno’.
Gati gjysma e tyre përmendi pole dancing (kërcim në tub) të Jennifer Lopez.
“Më duhej t’i dërgoja fëmijët e mi në dhomë që të mos shihnin çfarë iu ofrua”, ka shkruar një person në rrjetet sociale.
Cassius Life thotë që sipas prindërve shfaqja kishte përmbajtje seksuale.
Të tjera ankesa përmendën lëvizjen #MeToo, që mbron të drejtat e grave, por në anën tjetër ‘gratë shesin si vlerë seksualitetin e tyre’.
Performanca e tyre u konsiderua si ‘e neveritshme’ dhe pjesa dërrmuese thanë se do të bojkotojnë “Super Bowl”. /Telegrafi/
