Kontingjentet shqiptare të Forcave të Armatosura, pjesë e Komandës Perëndimore në Kosovë, do të vijojnë misionin e tyre si pjesë e KFOR.
Ministri i Mbrojtjes, Niko Peleshi, njoftoi sot përmes rrjeteve sociale vijimi i misionit, çka u konfirmua përmes një ceremonie të zhvilluar enkas, ku palët shkëmbyen dhe flamujt respektivë.
“Kontingjentet shqiptare, pjesë e Komandës Perëndimore Kosovë i dorëzuan njëra-tjetrës flamurin për të vijuar misionin si pjesë e KFOR”,- bënë të ditur Peleshi.
“Efektivët tanë u nderuan me medalje nga NATO dhe 4 prej tyre nga Ministria e Mbrojtjes e Italisë, për kontributin e dhënë për ruajtjen e paqes e sigurisë!”, përfundon njoftimin e tij, Ministri Peleshi.
Ceremonia u zhvillua në “Camp Villaggio Italia”, seli e Komandës Rajonale Perëndimore (RC-W) të KFOR-it.
Sakaq, këtë javë Komanda Rajonale e KFOR-it Perëndimor (RC-w), nga data 4 deri më 6 korrik 2023 do të zhvillojë stërvitjen “Big Rock”, në pjesën perëndimore të Kosovës. Stërvitja, e cila është rutinë ushtarake do të kryhet nga kontingjenti shumëkombësh RC-W dhe do të përmirësojë gatishmërinë dhe përgatitjen e njësive. /Telegrafi/
