Një shpërthim i fuqishëm ka ndodhur tek shtëpia e presidentit të Federatës së Futbollit të Shqipërisë, Armand Duka.
Fatmirësisht nga ky shpërthim nuk ka pasur asnjë të lënduar, edhe pse familja e Dukës ka qenë brenda shtëpisë.
Vet i pari i FSHF-së foli për gazetarët duke treguar se sapo ka mbërritur në shtëpinë e tij, teksa tregoi se në kamerat e sigurisë është parë një njeri duke vendosur shpërthimin.
Policia e Durrësit ka dhënë njoftimin zyrtar mbi shpërthimin me tritol në afërsi të banesës së kreut të Federatës Shqiptare të Futbollit, Armand Duka.
Në një njoftim për mediat, policia bën me dije se si pasojë e shpërthimit është dëmtuar vetëm porta e jashtme e banesës së Dukës.
Deri më tani, nuk ka një person të dyshuar për ngjarjen, teksa policia po punon për zbardhjen e plotë të saj.
Njoftimi i policisë:
Më datë 24.01.2022, rreth orës 22:10, në lagjen nr. 4, Durrës, para portës së shtetasit A. D. dyshohet se ka shpërthyer një sasi lënde plasëse. Si pasojë e shpërthimit janë shkaktuar vetëm dëme materiale në portën e jashtme të banesës.
Grupi hetimor ndodhet në vendngjarje dhe po punon për sqarimin e rrethanave të ngjarjes.
Duka së fundmi është në një ‘luftë’ në distancë me të parin e Bashkisë së Tiranës, Erion Veliaj i cili synon ta rrëzojë atë nga FSHF-ja.
Por pas shpërthimit tek shtëpia e Dukës, ka reaguar edhe Veliaj i cili ka thënë se duhet të intervenojë urgjentisht policia, prokuroria dhe kamerat, të sigurohet jeta e kujtdo, pasi sipas Veliajt, Duka është kundërshtari i tij, por jo armiku. /Telegrafi/