Presidenti i Autoritetit Palestinez, Mahmoud Abas, gjatë një takimi që ka pasur me një organizatë nga Izraeli ka deklaruar se negociatorët e dërguar nga presidenti i SHBA-së, Donald Trump, i kanë propozuar atij një konfederatë ndërmjet Palestinës dhe Jordanisë.
Abas ka thënë se do ta pranonte vetëm një konfederatë treshe, duke përfshirë Palestinën, Jordaninë dhe Izraelin, përcjell Telegrafi.
Këtë qëndrim të Abas mediat izraelite e kanë quajtur si një tërheqje e autoriteteve palestineze nga kërkesa e tyre për një zgjidhje të konfliktit me dy shtete.
Një konfederatë të mundshme mes Palestinës dhe Jordanisë dekada më parë e kishte propozuar edhe Izraeli, por pa përfshirë shtetin e tyre, siç kërkon Palestina.
Nga ana tjetër zyrtarët izraelitë ende nuk janë prononcuar në lidhe me idenë e konfederatës.
Por, autoritetet e Mbretërisë së Jordanisë kanë thënë se konfederata e mundshme mes Jordanisë dhe Palestinës nuk është një çështje në diskutim.
Pozicioni i Jordanisë është për zgjidhjen e konfliktit me themelimin e dy shteteve të pavarura, ku Palestinës do t’i takonte edhe Jerusalemi Lindor që Izraeli e do për kryeqytet.
Bisedimet e paqes izraelito-palestineze u ndërprenë në vitin 2014.
Administrata Trump ka thënë se po punon për një plan që do t’i jepte fund konfliktit 70-vjeçar, por ende nuk ka vendosur datë se kur do ta publikoj atë./Telegrafi/