Pikëkalimet kufitare në Jarinjë, Bërnjak dhe Merdar vazhdojnë të mbesin të bllokuara nga ana e Serbisë është këtë të martë.
Kështu ka bërë të ditur Ministria e Punëve të Brendshme, saktësisht Qendra Kombëtare e Menaxhimit Kufitar.
Rrugët janë bllokuar në territorin e Serbisë në afërsi të këtyre pikave kufitare, për shkak të protestave që janë mbajtur të hënën mbrëma nga serbët në këtë pjesë.
Në Jarinjë dhe Merdar rruga është bllokuar për kamionët dhe autobusët, ndërsa në Bërnjak nuk është i sigurt as kalimi i veturave.
Përditësimi i të dhënave të ministrisë lidhur me gjendjen në pikëkalimet kufitare është bërë në orën 10:49.
Ministria e Punëve të Jashtme dhe Diasporës, ka bërë thirrje të hënën për të gjithë ata që kanë hyrë në territorin e Serbisë dhe po udhëtojnë drejt Kosovës që t’i përdorin pikat kufitare në Mutivodë, Dheu i Bardhë ose të marrin rrugë përmes Maqedonisë së Veriut, ndërsa ata që nuk kanë hyrë ende në Serbi, ta shmangin rrugën përmes këtij vendi./Telegrafi/
