Kancelari gjerman Olaf Scholz i ka kërkuar presidentit rus Vladimir Putin që të gjejë një zgjidhje diplomatike për konfliktin e Ukrainës sa më shpejt të jetë e mundur, “duke përfshirë një tërheqje të trupave ruse”, kjo pas një bisede që e zhvilluan ata së fundmi.
“Kancelari dënoi në veçanti sulmet ajrore ruse kundër infrastrukturës civile në Ukrainë dhe theksoi vendosmërinë e Gjermanisë për të mbështetur Ukrainën në sigurimin e aftësisë së saj mbrojtëse kundër agresionit rus”, tha zëdhënësi i Scholz, transmeton Telegrafi.
Kremlini në anën tjetër raportoi se Putini i tha Scholzit se linja gjermane dhe perëndimore në Ukrainë ishte “shkatërruese” dhe i kërkoi Berlinit të rimendonte qasjen e tij.
Thirrja shërbeu për të nënvizuar hendekun midis Rusisë dhe qeverive perëndimore mbi Ukrainën, edhe pse Moska dhe Washingtoni kanë thënë në 24 orët e fundit se janë të hapura në parim për bisedime, raporton Reuters.
“Vëmendja u tërhoq nga linja shkatërruese e shteteve perëndimore, përfshirë Gjermaninë, të cilat pompojnë regjimin e Kievit me armë dhe po trajnojnë ushtrinë ukrainase. E gjithë kjo, si dhe mbështetja gjithëpërfshirëse politike dhe financiare për Ukrainën, çon në faktin se Kievi e refuzon plotësisht idenë e çdo negociate”, tha Kremlini.
“Kievi ka thënë se bisedimet e paqes janë të mundshme vetëm nëse Rusia ndalon sulmet në territorin ukrainas dhe tërheq trupat e saj nga toka ukrainase”.
Kremlini ka treguar se dëshiron një zgjidhje diplomatike dhe pretendon se Putin ka qenë gjithmonë i hapur për bisedime, por tha se kjo ishte e komplikuar nga refuzimi i Washingtonit për të njohur “territoret e reja” pasi rusët po pengonin një kërkim për ndonjë kompromis të mundshëm.
Në anën tjetër, një zëdhënës i qeverisë gjermane konfirmoi se Berlini nuk është në bisedime me Ukrainën për transferimin ose vendosjen e sistemeve të mbrojtjes ajrore Patriot atje.
Reuters raporton se Gjermania i ofroi Polonisë sistemin Patriot muajin e kaluar për të ndihmuar në sigurimin e hapësirës së saj ajrore pasi një raketë u rrëzua dhe vrau dy persona. Ministri polak i mbrojtjes Mariusz Błaszczak më vonë i kërkoi Gjermanisë të dërgonte njësitë e zjarrit në Ukrainë. /Telegrafi/