Konflikti i fundit midis Hamasit dhe Izraelit ka sjellë Rripin e Gazës dhe shtetin pjesërisht të njohur të Palestinës në fokusin e ciklit global të lajmeve.
Koalicioni i Organizatës për Çlirimin e Palestinës (PLO) shpalli zyrtarisht Shtetin e Palestinës më 15 nëntor të vitit 1988. Shteti pretendoi sovranitetin mbi Rripin e Gazës, Bregun Perëndimor dhe Jerusalemin Lindor.
Zyrtarisht, Kombet e Bashkuara e njohin PLO-në si entitet qeverisës në Bregun Perëndimor (përfshirë Jerusalemin Lindor) dhe Rripin e Gazës.
Pasi Izraeli dhe PLO nënshkruan Marrëveshjen e Oslos në mesin e viteve 1990, PLO mori kontrollin e Rripit të Gazës dhe 40 për qind të Bregut Perëndimor përmes administratës së sapokrijuar të Autoritetit Palestinez.
Megjithatë, pas konfliktit ushtarak të vitit 2007 midis fraksioneve rivale palestineze të Fatahut (partia e shumicës së PLO) dhe Hamasit (një parti politike militante e ndarë nga PLO), Rripi i Gazës qeveriset nga Hamasi.
Visual Capitalist ka hartuar një listë të vendeve që aktualisht e njohin Palestinën si shtet dhe atyre që nuk e njohin.
Në analizën e paraqitur nga Visual Capitalist, theksohej se 138 nga 193 anëtarë të Kombeve të Bashkuara (OKB), që është 72 për qind, e njohin shtetin e Palestinës. Sigurisht, 55 vende nuk e njohin Palestinën.
Shumë vende perëndimore të botës, duke përfshirë të gjithë G7, nuk e njohin Palestinën. Në vend të kësaj, shumë prej tyre mbajnë marrëdhënie diplomatike joformale.
Ndryshe, Kosova dhe Palestina ende nuk e kanë njohur njëra-tjetrën si shtete të pavarura. /Telegrafi/