Rusia po vazhdon me propagandën e saj duke arsyetuar agresionin në Ukrainë dhe për këtë po i shfrytëzon rrjetet sociale, por që shumë shpejt po demantohet.
Në një mesazh të publikuar në llogarinë zyrtare në Twitter, ambasada ruse në Afrikën e Jugut ka falënderuar qytetarët për përkrahjen që po i jepet shtetit të tyre. Rusët po vazhdojnë që të thonë se në shtetin ukrainas po e luftojnë nazizmin.
“Të nderuar abonentë, ne kemi marrë një numër të madh letrash solidariteti nga afrikano-jugorët, si individë ashtu edhe organizata. Ne e vlerësojmë mbështetjen tuaj dhe jemi të lumtur që vendosët të qëndroni me ne sot, kur Rusia, si 80 vjet më parë, po lufton nazizmin në Ukrainë!”, ka shkruar ambasada.
Por, menjëherë ka reaguar ambasada gjermane në këtë shtet afrikan duke thënë se asgjë nuk ka me nazizmin ajo se çka po bën Rusia në Ukrainë, e cila gjë ka marrë shumë pëlqime.
“Na vjen keq, por nuk mund të qëndrojmë indiferent ndaj kësaj pasi kjo është më tepër se cinizëm. Ajo se çfarë po u bën Rusia fëmijëve, grave e burrave në Ukrainë nuk është për tu lavdëruar. Përfundimisht nuk është ‘luftë kundër Nazizmit. Turp kush do që bie në këtë grackë. Fatkeqësisht, ne jemi disi eksperta për Nazizmin”, kanë shkruar gjermanët në Twitter, të cilët kanë marrë pëlqime të shumta.
Theksojmë se rusët po mundohen tv arsyetojnë agresionin në çdo mënyrë, madje presidenti rus, Vladimir Putin ditë më parë ka deklaruar se me ukrainasit jemi vëllezër, të cilët po mundohemi t’i shpëtojmë nga pushtetarët nazist. /Telegrafi/