Një njësi ushtarake ukrainase ka thënë se ka shpartalluar një brigadë këmbësorie ruse nga territori i vijës së parë pranë Bakhmut, duke pretenduar se vërteton një deklaratë të kreut të grupit rus Wagner se forcat ruse ishin larguar.
Më vonë të mërkurën, gjeneral-koloneli Oleksandr Syrskyi, i cili drejton forcat tokësore të Ukrainës, tha se njësitë ruse në disa pjesë të Bakhmutit ishin tërhequr deri në 2 km (1.2 milje) si rezultat i kundërsulmeve.
Megjithatë, ai nuk dha detaje, shkruan The Guardian, përcjell Telegrafi.
Njësitë e Wagner kanë udhëhequr një sulm prej muajsh në qytetin lindor, por forcat ukrainase thonë se ofensiva po ngec.
Bakhmut është objektivi kryesor i ofensivës së madhe dimërore të Moskës dhe skena e luftimeve më të përgjakshme tokësore në Evropë që nga Lufta e Dytë Botërore.
Zëvendësministrja e Mbrojtjes e Ukrainës, Hanna Malyar, tha në Telegram se njësitë pro-Kiev nuk kishin humbur asnjë pozicion të vetëm në Bakhmut të mërkurën.
Ndërkohë vë në pah mediumi britanik, shefi i Wagner-it, Yevgeny Prigozhin, i cili ka akuzuar vazhdimisht forcat e armatosura të rregullta të Moskës për dështimin për të mbështetur siç duhet njerëzit e tij, tha të martën se brigada ruse kishte braktisur pozicionet e saj.
“Ushtria jonë po ikën. Brigada e 72-të rrëmbeu 3 km katrorë këtë mëngjes, ku unë kisha humbur rreth 500 burra”, tha Prigozhin.
Ndërkohë komanda ushtarake lindore e Ukrainës tha se brigada ruse ishte dëmtuar rëndë, megjithëse tha se Rusia ende po përpiqej të pushtonte pjesën tjetër të qytetit.
Që nga java e kaluar, Prigozhin ka kërcënuar se do ta tërheqë Wagnerin nga Bakhmut nëse forcat e armatosura të rregullta të Rusisë nuk dërgojnë më shumë municion.
Në fjalët e tij të fundit të mërkurën, ai tha se trupat e tij po merrnin vetëm 10% të predhave që u duheshin. /Telegrafi/