Sipas hulumtimeve të organizatës ndërkombëtare ”Global Financial Integrity” me seli në SHBA, në dhjetë vitet e fundit, në mënyrë joligjore nga Maqedonia kanë dalë rreth pesë miliard euro, transmeton Telegrafi.
Sipas Rregullores së re të Bashkimit Evropian (BE), vendet anëtare duhet të mundësojnë konfiskimin e pasurisë së përfituar në mënyrë kriminale, pas vendimit gjyqësor të plotëfuqishëm, si edhe paratë nga pronat e patundshme të shitura. Këto para duhet t’i kthehen buxhetit të shtetit nga i cili vjen personi.
Megjithatë, nuk ka të dhëna se sa nga këto para që kanë dalë nga Maqedonia ndodhen tani për tani në vendet e BE-së, ndërkaq ministri shtesë i financave, Kire Naumov, sqaron se kjo Rregullore e BE-së do t’ia hapë derën edhe Maqedonisë, për t’i kërkuar paratë e dala jashtë vendit në mënyrë joligjore, por që fillimisht një rregullore e këtillë duhet të miratohet edhe këtu./Telegrafi/