Superylli i futbollit, Cristiano Ronaldo, është duke u hetuar pasi i ka shkelur rregullat e mbrojtjes nga COVID-19 për ta dërguar partneren e tij, Georgina Rodriguez, në një udhëtim në një resort luksoz të skijimit për ditëlindjen e saj të 27-të.
35-vjeçari, i cili e pati pushim në ndeshjen e Kupës së Italisë (ndërmjet Juventusit dhe Spalit) e dërgoi bukuroshen në resortin Courmayer, i cili ndodhet 150 kilometra larg Torinos.
Në këtë mënyrë, ai i ka kaluar kufijtë në mes të Piedmont dhe Valle D’Aosta për një relaks dyditor.
Sipas gazetës italiane Corriere dello Sport, ata kanë qëndruar në një hotel, i cili ka qenë zyrtarisht i mbyllur, ndërsa Ronaldo dhe Georgina kanë publikuar video duke ecur me një automjet bore.
Në anën tjetër, në bazë të rregullave italiane për t’u mbrojtur nga coronavirusi, udhëtimi ndërmjet qyteteve është i ndaluar.
Në bazë të njoftimeve, çifti ka kaluar dy ditë në Val Veny, zonë e cila nuk është e qasshme, në të njëjtin vend ku Rodriguez e festoi ditëlindjen në vitin e kaluar, por pa prezencën e Ronaldos.
Ata nuk janë dënuar ende nga autoritetet, mirëpo e kanë fshirë menjëherë videon, në të cilën shiheshin duke ecur nëpër borë. Tashmë të dy janë kthyer Torino, por sipas beiN Sports, autoritetet janë duke e hetuar futbollistin.
Gjoba me të cilën përballet Ronaldo është 400 euro. Këtë shumë superylli portugez e fiton për shtatë minuta në kuadër të pagës së tij vjetore prej 30 milionë eurosh që e merr te Juve. /Telegrafi/