Shefi ekzekutiv i Juventusit, Fabio Paratici, ka thënë se spekulimet lidhur me të ardhmen e Cristiano Ronaldos janë dashakeqe.
Pas eliminimit të Bianconerëve nga Liga e Kampionëve, shumëkush e drejtoi gishtin kah superylli portugez dhe më pas u përhapën thashetheme se klubi planifikon ta largojë.
Ish-klubi i tij, Real Madrid, i ishte përmendur si destinacion shumë real, teksa është raportuar se agjenti Jorge Mendes kishte nisur bisedimet me Los Blancos.
“Më bën të qesh. Kurrë nuk kam imagjinuar se dikush mund të dyshojë në Ronaldon…”.
“Ronaldo ka fituar pesë Topa të Artë, nuk e di edhe sa tituj të Ligës së Kampionëve. Ka fituar aq shumë trofe dhe ka shënuar shumë gola për Juventusin. Është privilegj ta kemi këtu, jem të gëzuar që e kemi këtu”.
“Nuk ka dyshim se ai e përfaqëson të ardhmen e Juventusit”, ka deklaruar Paratici në një prononcim për Sky Sport Italia para ndeshjes së Juves ndaj Cagliarit, në të cilën CR7 shënoi het-trik në pjesën e parë. /Telegrafi/