Richard Sharp ka dhënë dorëheqjen nga pozita e president të BBC-së pasi një raport zbuloi se ai kishte thyer rregullat duke ndihmuar Boris Johnson të siguronte një kredi prej 800,000 funtesh (rreth 910,000 euro).
Sipas mediave të huaja, përcjell Telegrafi, hetimi u ngrit pasi raportet në Sunday Times zbuluan se Sharp, një bashkëpunëtor i ngushtë i Johnson, kishte luajtur një rol në financat personale të kryeministrit në të njëjtën kohë kur ai po kërkonte të siguronte pozicionin e lartë në BBC.
Dhe Sharp, një ish-bankier i Goldman Sachs, e ka kursyer kryeministrin Rishi Sunak që të mos detyrohet të vendosë për fatin e tij duke njoftuar se do të tërhiqet nga roli me ndikim në mbikëqyrjen e pavarësisë së transmetuesit publik në fund të qershorit.
Pas publikimit të raportit, Sunak tha se nuk e kishte parë raportin ose nuk kishte folur me z. Sharp pas dorëheqjes së tij.
Kryeministri u tha gjithashtu gazetarëve: “Kur ngrihen shqetësime, është e drejtë të ketë një proces të duhur, një proces të pavarur që ne nuk e paragjykojmë, e lejojmë të vazhdojë, të vërtetojë faktet e asaj që ka ndodhur, të arrihet në një përfundim”.
“… Richard Sharp ka dhënë dorëheqjen. Por është e drejtë që ne t’i bëjmë këto gjëra siç duhet dhe profesionalisht, mendoj se shumica e njerëzve do të mendojnë se kjo është gjëja e duhur për t’u bërë”.
Në deklaratën e tij të dorëheqjes, Sharp këmbënguli se shkelja e rregullave ishte “e paqëllimshme dhe jo materiale”.
“Megjithatë, kam vendosur se është e drejtë t’i japim përparësi interesave të BBC-së”, shtoi ai.
“Mendoj se kjo çështje mund të jetë një shpërqendrim nga puna e mirë e korporatës nëse do të qëndroja në post deri në fund të mandatit tim”.
“Prandaj këtë mëngjes kam dhënë dorëheqjen”.
Drejtori i përgjithshëm i BBC-së, Tim Davie, falënderoi zotin Sharp për shërbimin e tij dhe “përcjelljen dhe intelektin që solli në kohën e tij si drejtor”. /Telegrafi/