Trajneri i kombëtares shqiptare, Edoardo Reja në konferencën për shtyp para ndeshjes ndaj Andorrës paralajmëroi skuadrën e tij të mos mendojë për ndeshjen ndaj Francës dhe të japin 110 për qind nga vetja për të marrë maksimumin nga kjo sfidë pasi kundërshtari nuk është i lehtë.
Italiani i stolit kuqezi foli edhe për mungesën e Taulant Xhakës dhe mos pranimin e ftesës nga Eros Grezda.
“Kam një skuadër me djem inteligjent. Ia kam transmetuar se pika jonë e referimit është ndeshja me Andorrën. Duhet të kemi një rritje nga ana mentale. Nuk duhet nënvlerësuar kjo ndeshje, duhet të japim 110 për qind të kapacitetit tonë”, ka thënë fillimisht Reja në konferencë për shtyp.
“Kemi krijuar një ekuilibër në këtë skuadër, që na lejon të kemi shumë opsione. Unë dua që lojtarët që vijnë këtu të jenë të qetë pavarësisht luajnë apo nuk luajnë”.
“Kjo është një detyrë e trajnerit, për të vendosur se kush do luajë apo jo. Kemi një grup solid”.
“Nëse përmendim Eros Grezdës, më vjen keq, pasi mori ftesën dhe nuk pranoj të vijë. Mbi të gjitha është Shqipëria, rëndësi ka grupi. Nëse dikush mendon se është Mesi, nuk është kështu”, përfundoi italiani.