Telegrafi

Real Madridi triumfon me lehtësi ndaj Al Ain dhe fiton Kupën e Botës për Klube për të tretën herë me radhë

Shkumbin Pireva

Foto: Real Madrid/Twitter

Real Madridi ka fituar Kupën e Botës për Klube pasi ka triumfuar në finale ndaj Al Ain me rezultat të thellë 4-1.

Klubi mbretëror pasi ka fituar Ligën e Kampionëve në Evropë, ka triumfuar edhe Kupën e Botës për klube pasi ka mposhtur në finale Al Ainin.

Pjesa e parë e ndeshjes u karakterizua me dominim të Real Madridit, të cilët përveç shumë rasteve të krijuara gjetën edhe golin.

Goli i parë i ndeshjes erdhi pas 14-të minutave lojë dhe ishte Luka Modric, i cili shënoi supergol për 1-0 pas asistimit të Karim Benzemas.

Edhe Al Ain gjeti golin në minutën e 16-të me anë të Caios, por ky gol u anulua për pozitë jashtë loje.

Në pjesën e dytë, vazhdoi përsëri loja e mirë dhe dominimi i Real Madridit, të cilët arritën të gjejnë edhe tri gola dhe ta vulosin fitoren.

Luhej minuta e 60-të kur në skenë doli i riu Marcos Llorente, i cili shënoi një gol të bukur për epërsinë 2-0.

Deri në fund të ndeshjes pati edhe disa raste nga të dyja skuadrat dhe të dyja skuadrat arritën ta tundën rrjetën.

Ishte kapiteni Sergio Ramos (79′), i cili shënoi për epërsinë 3-0 të Real Madridit, ndërsa Tsukasa Shiotani (87′) ngushtoi rezultatin 3-1.

Kur pritej që ndeshja të përfundonte ishte Yahia Nader (90+) që shënoi autogol për rezultatin përfundimtar 4-1 duke bërë që Mbretërit të triumfojnë në finale dhe të fitojnë Kupën e Botës për Klube për herë të tretë radhazi.

Në çerekfinale, Real Madridi mposhti Kashiman me rezultat 3-1, ndërsa Al Ain befasoi River Platen duke e mposhtur në penalltia 2-3. /Telegrafi/