Kryetari i Deçanit, Bashkim Ramosaj, ka reaguar pasi Qeveria e Kosovës ka shfuqizuar vendimet e ish-kryeministrit Ramush Haradinaj për dhënien e tokave të Agjencisë Kosovare të Privatizimit disa komunave.
“Kryeministër Albin! Qyqan vendim paske marr!”, i ka thënë Ramosaj, kryeministrit aktual, Albin Kurtit.
Sipas tij, ndër vendimet më të mira që janë marr ndonjëherë për komunat, është ai i Qeverisë Haradinaj për dhënien e pronave komunave, të cilat prona administroheshin nga AKP.
“Vendimi në fjalë i 2019, i nxjerrë nga Qeveria Haradinaj në atë kohë, konkretisht nga kryeministri Ramush Haradinaj, i ka lehtësuar komunat që nuk kanë prona komunale, duke krijuar një standard të ri të zhvillimit ekonomik dhe mundësinë e realizimit të interesit publik të shprehur nga komunat, në këtë rast nga Komuna e Deçanit”, ka shkruar Ramosaj në rrjetin social Facebook.
Me vendimin e sotëm të Qeverisë Kurti, tokat që iu patën dhënë komunave: Gjilan, Ferizaj, Suharekë, Skenderaj, Deçan, Junik dhe Hani i Elezit, do t’i kthehen sërish AKP-së./Telegrafi/