Analisti, Sadri Ramabaja ka komentuar zhvillimet e fundit të krijuara brenda Qendrës së Numërimit të Rezultateve [QNR].
Ramabaja ka thënë se një pjesë e punëtorëve të administratës së Komisionit Qendror të Zgjedhjeve [KQZ] po insistojnë vazhdimisht që votat me çdo kusht të jenë të pavlefshme.
“Mediat po bëjnë më shumë zhurmë sesa Sami Kurteshi. Po insistohet se një pjesë e administratës n në KQZ dhe nga vëzhguesit me çdo kusht që votat të jenë të pavlefshme. Qëllimi i qartë, sidomos nga këta që kanë marrë pak vota në mërgatë. Pse grinden kot në KQZ ku legjislacioni është i qartë”, tha Ramabaja në TV Dukagjini.
Ramabaja tha se ka shpërputhje të votave të ardhura përmes postës dhe përfaqësive diplomatike.
“Nga disa krahasime në komunën e Mitrovicës, Ferizajt dhe Gjakovës, më bëri përshtypje një shpërputhje e madhe e votave që janë bërë direkt në ambasada dhe konsulata me ato të ardhura nga posta. Duhet bërë analizim i mirëfilltë ose hetim i saktë. Tek LDK-ja kemi shpërputhje të madhe”, shtoi ai.
Analisti thotë se degët e LDK-së në Gjermani dhe Zvicër “duket se kanë bërë inxhiniering të votave”.
“Strukturat e LDK-së sidomos në Gjermani janë riaktivizuar në formën më të madhe të mundshme dhe një pjesë e madhe e tyre kanë votuar paraprakisht dhe me sugjerime. Kjo nuk do të thotë se edhe tjerat nuk kanë vepruar kështu. Do të doja shumë që të kishte një hetim shumë serioz sidomos për votat me postë”, ka deklaruar Ramabaja.
