Quintero dhe Camarena – dy emra që ndryshuan rrjedhën e historisë së drogës në Meksikë

Nol Elshani

2 years ago

Emrat e Caro Quintero dhe Kiki Camarena sërish janë në qendër të vëmendjes së mediave botërore pasi trafikanti meksikan i drogës u ri-arrestua pasditen e së premtes.

Caro Quintero u akuzua për vrasjen e detektivit të DEA-s, Kiki Camarena ndërsa po kryente punën hetimore në Guadalajara, selia e organizatës kriminale të Quintero dhe Miguel Angel Felix Gallardo, ish-udhëheqës dhe krijues i të ashtuquajturës ‘Federata e Drogës’.

Sipas versionit të DEA-s, Kiki Camarena arriti të depërtonte në Kartelin e Guadalajara në vitet 1980, transmeton Telegrafi.

Përmes hetimeve, ai ndihmoi që në vitin 1984 të kapet nëntëmijë ton marihuanë në fermën El Bufalo, që ndodhet në zonën “Trekëndëshi i Artë”, pronë e Caro Quintero, nga ku karteli prodhonte marihuanë në vlerë të tetë miliardë dollarëve, raporton marca.

Ky sekuestrim u konsiderua si një nga më të mëdhenjtë e bërë nga DEA në historinë e saj në atë kohë dhe ishte një goditje e madhe për trafikun e drogës.

Sipas DEA-s, Caro Quintero urdhëroi rrëmbimin e Kiki Camarenas në vitin 1985 prej duarve të policëve së korruptuar të atashuar pranë Drejtorisë Federale të Sigurisë, aparatit të atëhershëm të inteligjencës meksikane.

Camarena u dërgua në një shtëpi të vendosur në “881 Lope de Vega”, në lagjen Jardines del Bosque në Guadalajara, ku u torturua. Shtëpia ishte në pronësi të Rene Zuno Arce, kunati i ish-presidentit meksikan, Luis Echeverria Alvarez.

Trupi i Camarenas, me shenja të dukshme torture, u gjet pothuajse një muaj më vonë në një zonë rurale të Guadalajara.

Sipas Agjencisë amerikane kundër Drogës, Kiki Camarena pësoi tortura të rënda, ku kafka i ishte shpuar, megjithëse ishte mbajtur gjallë për të zgjatur agoninë nga një mjek i lidhur me trafikantët e drogës.

Pas gjetjes së trupit të agjentit të DEA-s, Kiki Camarena, SHBA zbatoi “Operacionin Legjenda” për të ndjekur rrëmbyesit, torturuesit dhe vrasësit.

Caro Quintero ishte i pari që u kap në Kosta Rika. Pas përfundimit të gjykimit, ai i kaloi 28 vjet të jetës prapa grilave në burgun e Guadalajaras.

Felix Gallardo, udhëheqësi i Kartelit Guadalajara në ato vite, u arrestua më pas, megjithëse asnjëri nuk u ekstradua në Shtetet e Bashkuara.

Në vitin 2013, Caro Quintero u lirua pasi Gjykata e Parë Kolegjiale për Çështjet Penale të Qarkut të Tretë në Jalisco vendosi që trafikanti i drogës nuk duhej të ishte gjykuar nën juridiksionin federal për vrasjen e Kiki Camarena.

Si përgjigje, Shtetet e Bashkuara e quajtën Caro Quintero një të arratisur nga drejtësia dhe vendosën një shpërblim prej 20 milionë dollarësh për këdo që jepte informacion që do të ndihmonte në kapjen e tij.

Sidoqoftë, deri në vitin 2015, qeveria meksikane e shpalli përsëri Caro Quintero fajtor për vrasjen e Kiki Camarena dhe krime të tjera, kështu që ai mbeti i arratisur nga drejtësia deri në arrestimin e ditës së djeshme. /Telegrafi/