Presidenti rus Vladimir Putin ka mbajtur një fjalim në Sheshin e Kuq të Moskës për të shënuar Ditën e Fitores kundër nazizmit.
Ai filloi duke uruar komandantët e “operacionit special ushtarak” duke shtuar se Dita e Fitores është një festë për të nderuar “gjyshërit e babait tonë” që “luftuan për atdheun”.
Por siç ka thënë më tej ai: “Sot kemi një luftë të vërtetë kundër nesh” duke shtuar se Rusia po mbrohet kundër “terrorizmit ndërkombëtar”.
Më pas ai akuzoi elitat perëndimore dhe globalistët se “po provokojnë konflikte…duke inkurajuar rusofobinë dhe nacionalizmin”.
“Po shkatërrojnë vlerat tradicionale të familjes”, citohet të ketë thënë presidenti rus, shkruan Sky News, përcjell Telegrafi.
Në këtë drejtim, ai pretendon se populli ukrainas është bërë peng i ambicieve të Perëndimit.
Parada dhe festimet e sotme të Ditës së Fitores në Moskë vijnë pasi Rusia lëshoi një valë të re raketash në Ukrainë gjatë natës.
Dhe lidhur me fjalimin e tij ka ardhur një reagim nga Ukraina.
Një ndihmës i lartë i presidentit ukrainas Volodymyr Zelensky, Oleksiy Danilov, thotë se “parada e vetme” që meriton “vrasësi i fëmijëve ukrainas” është ajo e pushtuesve rusë që janë vrarë në territorin ukrainas “pa lavdi dhe nder”.
Një paradë e tillë mund të vazhdojë “për orë të tëra”, sugjeron ai. /Telegrafi/