Edhe 3 ditë kanë mbetur deri në mbajtjen e seancës konstituive të Kuvendit të Kosovës, por marrëveshja për koalicion qeverisës mes Lëvizjes Vetëvendosje dhe LDK-në nuk po shihet gjëkundi.
Këto dy parti që dolën të parat në zgjedhje po vazhdojnë të përplasen me njëra-tjetrën për postin e presidentit, çka po bën që të lënë peng edhe nënshkrimin e koalicionit qeverisës mes tyre.
Por ish-shokët e Albin Kurtit, tani zyrtarë të Partisë Socialdemokrate po kritikojnë këtë të fundit dhe Isa Mustafës që nuk po arrijnë marrëveshje.
Shqipe Pantina nga PSD thotë se VV e LDK thotë këto dy parti jo që nuk po mund të arrijnë marrëveshje, por nuk po duan ta bëjnë këtë gjë.
“S’është problem pozita e presidentit, por mosgatishmëria e tyre për ta formuar qeverinë të cilën e presin vendime të vështira, ku më e rëndësishmja është marrëveshja me Serbinë”, tha Pantina për Reporterin
Ajo ka kujtuar se si Kurti ka qenë një kundërshtar i fortë si opozitar ka qenë kundër çfarëdo zgjidhje me Serbinë.
“VV në këtë rast, Kurti si i pari mandatar nuk është gati me marrë përgjegjësi, për faktin se ai e ka kundërshtuar çfarëdo lloj zgjidhje me Serbinë, e propozuar nga ndërkombëtarët, pra nuk është gati me pranu një zgjidhje që e ka kundërshtuar me vite”, ka deklaruar ajo.
Kurse e pyetur për rolin që PSD-ja do ta ketë si parti opozitare jashtëparlamentare, Pantina thotë se shenjat e para nuk po tregojnë se VV do të udhëheq siç ka premtuar vendin.
“Ata kanë kritikuar kapjen e shtetit, e cila është evidente nga partitë që kanë qeverisë deri tani, por mënyra si e kanë premtuar ta bëjnë ç’kapjen është një rikapje e re, si propozimi që bordet e ndërmarrjeve të emërohen nga shteti”, thotë Pantina.
Zyrtarja e PSD-së thotë se do të ofrojnë alternativa për mënyrën e qeverisjes.
“PSD sot ka zgjedh Këshillin e Përgjithshëm dhe Kryesinë e re ku ka pasur diskutime si të ecim përpara, dhe pastaj do të merret me shtrirjen e subjektit. Ka hapësirë të madhe për opozitë duke ditur që partitë që kanë qenë në qeveri deri tani kanë qeverisur jashtëzakonisht keq. Qeveria e re do të bëjë gabime në vazhdimësi, dhe detyrë e jona do të jetë të ofrojmë alternativa për mënyrën e qeverisjes së vendit, për zhvillimin në përgjithësi. Nuk kemi probleme veç me qeverinë dhe qeverisjen, por edhe shoqërinë që duhet si shoqni t’i adresojmë pabarazitë e mëdha”, tha ajo.