Dëshironi ta dini si shkon procesi i shtatzënisë secilin tremestër?
Atëherë jeni me fat, pasi që në këtë artikull do ta keni mundësinë të mësoni hollësisht se si zhvillohet bebja çdo javë derisa të lind, transmeton Telegrafi.
Tremestri i parë
Pas ngjizjes, bebja fillimisht është vetëm embrion: dy shtresa të qelizave prej të cilave zhvillohen të gjitha organet dhe pjesët e trupit. Bebja në këtë fazë nuk ka madhësi të madhe dhe rritet vazhdimisht, madje zemra fillon t’i rrah dhe zorrët formohen.
Përveç tyre, formë marrin edhe veshët, goja, hunda, etj.
2 javët e para të shtatzënisë
Kjo është periudha ku ju ndryshon e tërë jeta. Qelizat tuaja do të ovulojnë dhe nëse qeliza vezë takohet me spermatozoidin, ju mbetni shtatzënë.
Java e 3-të e shtatzënisë
Bebja juaj është top i vogël – quhet blastocist – dhe përbëhet nga qindra qeliza të cila shumëfishohen shpejt.
Java e 4-të e shtatzënisë
Thellë në mitrën tuaj, bebja është embrion që përbëhet nga dy shtresa, ndërkaq placenta primitive është duke u zhvilluar.
Java e 5-të e shtatzënisë
Embrioni i vogël rritet me shpejtësi të madhe, ndërkaq ju filloni të vëreni ndryshime në gjoks dhe lodhje.
Java e 6-të e shtatzënisë
Hunda, goja dhe veshët e bebes fillojnë të marrin formë. Ju mund të keni probleme me shëndet në mëngjes (vjellje).
Java e 7-të e shtatzënisë
Bebja juaj – ende një embrion i vogël me bisht – është duke i formuar duart dhe këmbët, ndërkaq mitra juaj është dyfishuar në madhësi.
Java e 8-të e shtatzënisë
Bebja është vazhdimisht në lëvizje, ndonëse ju nuk e vëreni. Ndërkohë ju mund të jeni duke marrë vendime për t’i bërë testet e shtatzënisë.
Java e 9-të e shtatzënisë
Bebja është thuajse 4 centimetra e gjatë, ndërkaq ka filluar të marr pamjen e njeriut. Në këtë periudhë e vëreni edhe belin më të trashë.
Java e 10-të e shtatzënisë
Bebja e ka zhvilluar pjesën më kritike të zhvillimit. Organet dhe strukturat janë të vendosura dhe të gatshme për t’u rritur.
Java e 11-të e shtatzënisë
Duart e bebes fillojnë të hapen dhe të mbyllen në grusht.
Java e 12-të e shtatzënisë
Gishtat e këmbëve të bebes mund të dredhohen, flokët rriten me shpejtësi dhe veshkat fillojnë të sekretojnë urinë.
Java e 13-të e shtatzënisë
Është java e fundit e tremestrit të parë! Bebja ka gjurmë të holla gishti dhe është pothuajse 8 centimetra e gjatë.
Tremestri i dytë
Në fillim të tremestrit të dytë, bebet janë rreth 9 centimetra të gjata dhe nuk peshojnë as gjysmë kilogramë. Gjurmët unike e të vogla të gishtit janë të vendosura, ndërkaq zemra pompon gjak. Duke shkuar javët, skeleti i bebes fillon të forcohet dhe zhvillohet aftësia për të dëgjuar.
Java e 14-të e shtatzënisë
Gjatë kësaj periudhe mund të ndiheni me më shumë energji dhe keni më pak marramendje.
Java e 15-të e shtatzënisë
Bebja mund ta vërejë dritën dhe ka filluar t’i formojë shqisat e shijimit.
Java e 16-të e shtatzënisë
Në javët e ardhshme bebja fillon të dyfishohet në peshë dhe të rritet më shumë.
Java e 17-të e shtatzënisë
Skeleti i bebes është duke ndryshuar nga kërc i butë në eshtra, ndërkaq kordoni i kërthizës forcohet dhe trashet.
Java e 18-të e shtatzënisë
Gjenitalet e bebes zhvillohen mjaftueshëm sa për t’i parë në ultrazë. Ndiheni e uritur? Është normale që gjatë kësaj periudhe të përjetoni rritje në apetit.
Java e 19-të e shtatzënisë
Mos ngurroni dhe nisjani këngës: Bebja tani mund t’ju dëgjojë!
Java e 20-të e shtatzënisë
Urime, e keni kryer gjysmën e shtatzënisë! Bebja është duke u rritur vazhdimisht dhe duke prodhuar mekonium.
Java e 21-të e shtatzënisë
E ndjeni beben duke lëvizur? Normale sepse tani bebja fillon të godit më shumë. Fakt tjetër interesant: Bebja tani ka edhe vetulla!
Java e 22-të e shtatzënisë
Bebja fillon të duket si miniaturë e porsalindur.
Java e 23-të e shtatzënisë
Kur jeni duke lëvizur, bebja e ndjen atë. Shumë shpejt ju filloni të keni ënjtje në këmbë.
Java e 24-të e shtatzënisë
Mitra juaj në këtë periudhë e ka madhësinë e një topi të futbollit.
Java e 25-të e shtatzënisë
Bebja është duke filluar të ketë dhjam bebe dhe duke i rritur flokët.
Java e 26-të e shtatzënisë
Bebja është duke marr dhe liruar sasi të vogla të lëngjet amniotik.
Java e 27-të e shtatzënisë
Ndiheni e gudulisur? Kjo për shkak se bebja fillon t’i hap e mbyll sytë, madje edhe t’i thithë gishtat e vet.
Tremestri i tretë
Bebja në fillim të këtij tremestri peshon 1 kilogram, mund t’i hap e mbyll sytë, etj. Përveç këtyre, bebja gjatë tremestrit të fundit fillon t’i zhvilloj thonjtë, flokët e vërtetë dhe i shtohen miliona neurone trurit të bebes.
Java e 28-të e shtatzënisë
Mirë se vini në tremestrin e fundit! Sytë e bebes tuaj tani mund ta shohin dritën që përçohet në mitrën tuaj.
Java e 29-të e shtatzënisë
Muskujt e bebes dhe mushkëritë janë duke vazhduar të zhvillohen, ndërkaq i rritet edhe koka për të krijuar hapësirë për trurin që vazhdimisht zhvillohet.
Java e 30-të e shtatzënisë
Bebja tani peshon pothuajse 1.3 kilogramë. Ndërkohë, ju jeni duke e luftuar lodhjen dhe luhatjen e disponimit.
Java e 31-të e shtatzënisë
Goditjet e forta të bebeve mund t’ju mbajnë zgjuar gjatë natës.
Java e 32-të e shtatzënisë
Bebja veç po rritet, ndërkaq me rritjen e mitrës ju mund të përjetoni probleme me frymëmarrje.
Java e 33-të e shtatzënisë
Duke marrë parasysh se bebja tani peshon afër 2 kilogramë, ju do të keni probleme të ndiheni komode në shtrat.
Java e 34-të e shtatzënisë
Sistemi nervor qendror i bebes dhe mushkëritë janë duke u pjekur, ndërkaq lodhja dhe marramendjet juve ju kanë ngadalësuar.
Java e 35-të e shtatzënisë
Ende i ndjeni lëvizjet e shpeshta të bebes – por ndoshta më pak dramatike.
Java e 36-të e shtatzënisë
Bebja çdo ditë shton peshë, ndërkaq fillon të peshoj më shumë në pjesën e fundit të barkun tuaj.
Java e 37-të e shtatzënisë
Truri dhe mushkëritë vazhdojnë t’i zhvilohen bebes, ndërkaq ju keni më shumë rrjedhje vagjinale dhe kontraksione të herëpashershme.
Java e 38-të e shtatzënisë
Shikoni për shenja të preklampsisë.
Java e 39-të e shtatzënisë
Bebja tani ka madhësinë e një kungulli të vogël. Mos u brengosni nëse ende jeni shtatzënë – është normale të mos lindni me kohë.
Java e 40-të e shtatzënisë
Sado komod që mund të ndihet bebja në bark, nuk mund të rrijë aty shumë gjatë. Në këtë periudhë ose lindni në mënyrë natyrale, ose me ndihmën e ndërhyrjeve. /Telegrafi/
