Ditët e para të prillit mbuluan vendin me borë, pas një dimri të butë dhe pa reshje.
E dimri duket se u rikthye për disa ditë në prill, ndërsa pamjet tregojnë se në shumicën e qyteteve në vend ka pasur reshje të dendura bore.
Fotografi i Telegrafit, Ridvan Slivova ju sjell fotografi nga kryeqyteti, gjersa Policia e Kosovës ka u ka bërë thirrje qytetarëve që kenë kujdes gjatë vozitjes për shkak të ngricave në rrugë.
E për shkak të reshjeve të dendura një lis ka rënë sot në orët e hershme të mëngjesit në rrugë tek parku i qytetit, duke bllokuar njëkohësisht edhe qarkullimin e qytetarëve dhe të veturave por që fatmirësisht nuk ka të lënduar.
E kryetari i komunës së Prishtinës, Përparim Rama ka bërë të ditur se janë mobilizuar të gjitha ekipet për të siguruar që rrugët të jenë të sigurta për qarkullim.
Ai përmes një postimi në rrjetin social në Facebook ka bërë thirrje që qytetarët të shtojnë kujdesin në komunikacion.
“Në terren. Ekipet fantastike të #kryeqytetit janë mobilizuar për t’u siguruar që rrugët të jenë të sigurta për qarkullim. Ju bëjë thirrje qytetarëve tanë të shtojnë kujdesin në komunikacion. Në çdo kohë, në çdo vend – për #kryeqytetin. #prishtinapraktike”, ka shkruar Rama në Facebook.
Mot i ngjashëm pritet të mbajë gjatë dy ditëve në vijim. /Telegrafi/
