Presidentja e vendit, Vjosa Osmani është parë në shkallët e stadiumit Olimpik, aty ku ka filluar ceremonia hapëse e Lojërave Olimpike “Tokio 2020”.
Lojërat Olimpike “Tokio 2020” janë hapur zyrtarisht me një ceremoni e cila ka filluar nga ora 13:00.
Pas një spektakli të krijuar me fishekzjarrë dhe flakadanë, radha i erdhi edhe parakalimit të shteteve.
Ekipi olimpik i Kosovës parakaloi si shteti i 67-të, i prirë nga bajraktarët Majlinda Kelmendi dhe Akil Gjakova.
Në shkallët e stadiumit në përkrahje të ekipit të Kosovës ishte edhe presidentja e vendit, Vjosa Osmani.
Osmani u pa duke përkrahur ekipin olimpik me një flamur të Kosovës në duar.
Presidentja e vendit ka reaguar disa minutë më vonë edhe në profilin e saj privat në Facebook.
Ajo ka shkruar se është nder dhe krenari ta shoh parakalimin e 11-të sportistëve të Kosovës, të cilët po marrin pjesë në Lojërat Olimpike në Tokio. /Telegrafi/
