Varshava ka njoftuar se i ka marrë të gjithë hapat për të siguruar hapësirën ajrore të vendit pasi Moska ka goditur së fundmi Ukrainën me raketa.
Bëhet e ditur se forcat ajrore të Polonisë po përdorin aeroplanë për të mbrojtur hapësirën ajrore të vendit nga raketat ruse që synojnë Ukrainën Perëndimore.
Forcat ajrore polake kanë kryer patrullime në juglindje të vendit, pjesë e cila kufizohet me Ukrainën, shkruan euronews, përcjell Telegrafi.
“Për shkak të përfundimit të sulmeve me raketa me rreze të gjatë veprimi të rusëve ndaj objektivave ukrainase në perëndim të Ukrainës, edhe operacioni ushtarak në hapësirën ajrore polake ka përfunduar”, ka njoftuar komanda operative e Polonisë me anë të një deklarate.
“Ushtria polake po e monitoron situatën në territorin e Ukrainës në mënyrë të vazhdueshme dhe mbetet e gatshme për të garantuar sigurinë e hapësirës ajrore polake”, shtoi ajo.
Ndryshe, pushtimi i plotë i Ukrainës nga Rusia ka sjellë shqetësime për sigurinë në rritje në rajon.
Varshava i vuri forcat e saj në gatishmëri në mars kur një raketë ruse hyri në hapësirën ajrore polake përpara se të godiste rajonin perëndimor të Ukrainës Lviv. /Telegrafi/