Sot (e diel), qytetarët e Kosovës me të drejtë vote, do kenë mundësi për të votuar dhe për të zgjedhur kryeministrin e ardhshëm e po ashtu edhe 120 deputetët e Kuvendit të Kosovës.
Përveç qytetarëve, votimin tashmë e kanë përfunduar edhe shumë prej figurave të njohura publike nga fusha e politikës.
Shumë prej tyre u bënë thirrje qytetarëve të vendit tonë që të dalin dhe ta kryejnë obligimin e tyre, pavarësisht zgjedhjeve që bëjnë.
Presidenti, përfaqësues të subjekteve politike, deputetë dhe vetë kandidatët janë ata që u panë sot, gjersa kryenin obligimin.
Telegrafi në vazhdim ju sjell momentin ku shumë prej tyre votuan dhe për këtë ditë të rëndësishme për vendin, të njëjtit kishin zgjedhur kostume mjaft elegante, të shoqëruar nga bashkëshortet e tyre, të cilat gjithashtu zgjodhën veshje mjaft të bukura.
Kadri Veseli & Violeta Veseli
Kandidati për kryeministër nga radhët e PDK-së, Kadri Veseli, ka votuar sot së bashku me bashkëshorten e tij, Violetën.
Ai zgjodhi një kostum elegant më të mbyllët, teksa vëmendje të madhe rrëmbeu Violeta me kostumin e saj ngjyrë të kaltër, i cili e shfaqte për mrekulli.
Albin Kurti dhe Rita Augestad Kndusen
Edhe kandidati për kryeministër nga radhët e LVV-së, Albin Kurti, i shoqëruar nga bashkëshortja e tij dhe vajza e vogël ka kryer obligimin e tij duke votuar.
Kurti kishte të veshur një kostum gri, teksa bashkëshortja e tij norvegjeze zgjodhi një veshje më ndryshe, bardh e zi.
Ramush Haradinaj dhe Anita Muçaj – Haradinaj
Ditën e sotme ka votuar edhe kandidati për kryeministër nga radhët e koalicionit AAK-PSD, Ramush Haradinaj, i shoqëruar nga bashkëshortja e tij,Anita Haradinaj, të cilët votuan në shkollën “Ali Sokoli” në Prishtinë.
Si çdo herë tjetër, çifti Haradinaj vijnë mjaft në formë dhe natyrisht se Anita dukej e mahnitshme me veshjen atraktive që zgjodhi.
Hashim Thaçi dhe Lumnije Thaçi
Obligimin e tij për të votuar e ka kryer edhe Presidenti i Republikës së Kosovës, Hashim Thaçi, nën shoqërimin e bashkëshortes së tij, Lumnijes.
Dyshja ishin kombinuar mjaft mirë, ndërsa fustani gri dhe flokët e valëzuara të Zonjës së Parë tërhoqën gjithë vëmendjen.
Vjosa Osmani dhe Prindon Sadriu
Përveç tyre, obligimin për të votuar e ka kryer edhe kandidatja për kryeministre nga Lidhja Demokratike e Kosovës, Vjosa Osmani bashkë me burrin e saj, Prindon Sadriu, derisa votuan në Fakultetin Teknik në Prishtinë.
Vjosa shkëlqeu në fustanin e zi dhe duket se bashkëshorti i saj i është kombinuar partneres, pasi shfaqen në ngjyra të njëjta.
Përndryshe, 1 milionë e 937 mijë e 868 qytetarë me të drejtë vote, sot nga ora 07:00 kanë filluar të ushtrojnë të drejtën e tyre për të votuar në 895 qendra të votimit që janë hapur në tërë Kosovën. /Telegrafi/