Ky është momenti rrëqethës kur shoferi i një kamioni i cili po kërkonte në telefonin e tij një podcast, përplaset në veturën e përkuar në skaj të rrugës, dhe për pak sa nuk i godet personat që gjendeshin në trotuar.
Kamera e vendosur brenda kabinës së kamionit të 44-vjeçarit Raymond Catterall, shfaq momentin kur derisa po lëvizte me kamion në një autostradë në Britani të Madhe, shikon telefonin, transmeton Telegrafi.
Në një moment shpërqendrimi ai godet veturën e parkuar në skaj të rrugës, dhe për pak sa nuk i shtyp disa persona që ishin në skaj të rrugës.
Catterall i cili është nga Merseyside, është shpallur fajtor për vozitje të rrezikshme nga gjykata në Caernarfon. Ai u dënua me 8-muaj burgim si dhe për 18-muaj i është konfiskuar patentë-shoferi.
Aksidente të tilla nga pakujdesia dhe përdorimi i telefonave nuk është i rrallë në pothuajse çdo vend të botës, kurse autoritetet bëjnë thirrje që telefonat të lihen anash gjatë ngasjes. /Telegrafi/
